مين سعد الصغير

قبل عامين بالتمام والكمال .. كان من الصعب أن تعرف مطرباً اسمه سعد الصغير

إلا إذا كنت من سكان شبرا الخيمة والأحياء المجاورة لها .. أو إذا كنت من رواد ملاهى شارع الهرم الليلية إذا كان سيفاجئك سعد بطريقته فى الأداء وأسلوب رقصه اللذين كانا سبب نجاحه وشهرته لدى المنتجين ..

أما بداية جماهيريته فكانت فى ألبوم (شكراً ع الآخر ) لشركة هاى كواليتى خاصة عندما لاقت كليبات (إصحى ) (الكلام على مين ) نجاحاً .. تبعها عدد من الأفلام السينمائية .

سعد اختفى بعد فيلمه (لخمة راس) وأصبح وصول الصحفيين له نوعاً من المستحيلات ..

لكن الدستور انفردت معه بحوار عن ألبومه (حد يشترى قلب؟)..
بيقولو إنك بقيت مغرور بعد الفيلم ؟
أبداً والله .. المغرور دا يتكبر على أهله وحبايبه .. وأبسط حاجة لو عايز أتغر بعد ما ربنا فتحها على أعزل أو أجيب فيلا لكن لو رحت سألت عنى فى شبرا الخيمة مطرح ما اتولدت ولسة ساكن شوف الناس هتقولك إيه .

هتقولى إيه ؟
الحمد لله أنا فى منطقتى عضو مجلس شعب .. الناس كل يوم بتقصدنى عشان أحل لهم مشاكل أو أشوف حد منهم فى أقسام .

وإيه الجديد فى ألبومك ؟
عامل 12 أغنية زى وزة ، حد يشترى قلب ، شوفو ، العبد لله ، هيصة ، رنة ، هتجوز .. الكلمات أغلبها لـ ملك عادل و الألحان لـ محمد عبد المنعم وعصام اسماعيل وتوزيع أحمد عادل ويعتمد فيها على الإفيه الشعبى الدارج زى أغنية وزة بقول فيها ( مش أى بيضة حلوة تبقى وزة ولا أى لابسة كات تبقى مزة )

طب والأغنية الهيد ؟
الأغنية بتقول حد يشترى قلب ؟ .. حد عايز يتحب فرصة أوكازيونات .. وحنين على البنات وحياة ربنا ما بهرج إللى ما يشترى يتفرج .. أنا أجمد قلب فى مصر .. أنا قلبى ضد الكسر قلبى بيتباع بضمانه يا تلحق يا ما تلحقش ) .

أنت مش شايف الأغنية شبه أغنية (قلب فاضى ) إللى كتبها بهاء الدين محمد لـ محمد منير ؟
أنا مبلقدش حد والفكرة ملك اسماعيل كتبها بأسلوب شعبى عن واحد عايز يبيع قلبه وقولونه وكل حته فيه بس يتحب والسلام .

بوسترات الشركة متصور فيها كلاسيك شوية بعيد عن الحركات الشقية والشكل الشعبى ليه؟
عادى .. حبيت أقول للناس إنى ساعات ببقى بجينز وتى شيرت وساعات بلبس بدلة .

ما فكرتش تغنى أغانى سياسية ذى شعبان عبد الرحيم ؟
لأ

مع إنك عملت لوحة تأييد للرئيس فى شارع الهرم ساعة الانتخابات ؟
دى حاجة ودى حاجة لما ريسنا يبقا نازل انتخابات لازم نقف معاه ونقوله إننا واقفين جمبه لكن ما بحبش أدخل مواقفى السياسية فى الأغانى .

ليه ؟
لأنى بصراحة مابفهمش فى السياسة .. ولا شعبان ولا أى مطرب شعبى بيفهموا فيها و بينتهزوا الأحداث فرصة عشان يستهبلوا و ياكلوا عيش من وراها .
.
مبتفكرش ترشح نفسك فى مجلس الشعب ما دمت محبوب أوى فى شبرا وبتحل المشاكل إللى حواليك ؟
مبفكرش خالص .. أنا بحل مشاكل الناس عشان ربنا يكرمنى فى شغلى وفى بيتى مش عشان أسرق الناس و أخد منصب وأطلع فى التلفزيون زى أى حد فى مجلس الشعب .

أنت إيه رأيك فى شعبان ؟
شعبان بقى مكرر ومحفوظ ومبيجددش وبتبقى عارف هو طالع يقول إيه حتى لو مسمعتش الأغنية ..